馬偕在台灣記事From Far Formosa(漢羅／英文對照)

內容簡介

本書是馬偕對台灣的各項觀察記錄，包括歷史、地理、民族學、地質學、植物學等，推薦給想了解清朝統治台灣末期的人。

原文編輯序

福爾摩沙（台灣）對西方世界來講，它bat是一个遙遠koh生疏ê所在。當它成做中日戰爭ê暴風中心ê時，它引起大家ê注目，mā因為ánne giú近它kah西方世界ê距離。M̄ koh，tī戰爭ê烏雲罩óa chìn前ê二十gōa年，早to̍有一kóa人tùi遠遠ê所在teh關注 chitê tī海洋hit pêng ê美麗島嶼。In所以ē關心它ê命運，是因為有一位信仰親像保羅，而且ē tàng自我犧牲ê人，伊奉獻kakī來到chia，期待台灣 chitê島嶼ē因為ánne，ē tàng tùi過失kah罪惡中得tio̍救贖。伊to̍是hō加拿大長老教會久長以來看做是宣教英雄ê馬偕。

馬偕第二pái休假，回國述職期間，伊hông選做加拿大長老教會總會ê議長，而且直到伊tī 1895年10月16日結束休假，tùi溫哥華起帆tńg來台灣chìn前，伊bat訪問全加拿大、美國kah蘇格蘭ê真chē所在，而且tī教會會眾中á是會議中演講。Tī所有ê場合中，大家lóng感覺伊是一个偉人kah英雄，致使對他ê生活kah工作ê koh khah完整記錄ê要求soah jú來jú迫切。真chē朋友lóng知，伊對台灣ê認bat kah了解比伊仝時代ê任何人lóng khah廣泛koh可靠。 Chiahê朋友相信有關伊ê經驗kah工作ê記述，一定ē鼓舞教會ê信仰kah熱誠。總是，因為伊tī台灣ê工作不管時lóng tī無確定性kah危險中，所以chiahê朋友擔心，萬一有關伊ê服事工作iáu未記載落來報hō人知chìn前，伊to̍發生事故，ánne to̍真遺憾ā。因為ánne，大家lóng催迫伊tio̍量早kā伊ê工作kah生活好好á記述落來，所以chit項tāichì有它ê迫切性。M̄ koh，對伊chit種性情熱phutphut，koh慣勢活跳工作ê人來講，長時間ê文學工作，是一件siōngkài hō人厭倦koh無聊ê苦工。伊寧可去面對一陣橫逆ê異教徒，mā無想beh為chit本記述寫一小篇。總是，伊mā有認同chit項tāichì ê要緊性，所以tī McTavish牧師ê大力協助下，伊開始進行chit項工作。相連續幾nā禮拜，伊除了無停查閱伊過去ê筆記kah日記，以及探索伊豐富ê記憶以外，伊差不多lóng無做其它ê tāichì。

幾個月前，馬偕博士kā大量ê文字資料交到我ê手裡，包括伊ê筆記、觀察心得、日記kah報告ê摘要記述、科學方面ê研究、敘述ê片段kah人物ê素描，而且吩咐我tio̍hkā chiahê資料整編成形，koh hō它有活命。雖然伊tī編輯上hō我全權決定，m̄ koh這無hō我感覺輕鬆，顛倒是感覺任務重大。因為我知，編寫chit種物件真容易大走精，tú親像英國出名ê歷史學家兼評論家Macaulay teh談論歷史編寫ê時所講ê，tio̍算你所寫ê ta̍k个細節kiámchhái lóng真正確無誤，m̄ koh iáu是ē hō人讀了後，對事件bē tàng有完整ê概念，á是ē產生誤解。所以，我kā伊交hō我ê ta̍k份資料lóng tiàm伊ê面頭前詳細閱讀kah研究，需要註解ê所在，mā lóng由伊來口述完成；資料beh án怎分類kah編排，mā lóng先得tio̍伊真心ê贊同。跟tòe編輯工作ê進行，見若發現有啥物所在oh得連接ê時，伊to̍h ē oh再補充一kóa資料，而且ta̍k篇ê最後手稿，mā差不多lóng是由伊來做修訂。編輯ê目的m̄ nā是beh保存作者ê原意，同時mā beh保存作者文學風格ê完整性，也to̍是保留馬偕博士tī公開演講ê時所特有ê hit種活力、大膽kah Celtic人ê熱情。

相信有智慧ê大眾一定ē欣賞本冊內底可靠ê資訊kah動人ê事件；馬偕博士ǹg望kā一kóa平淡無奇卻極有教導性ê物件，hē tī顯著ê地位。本冊ê第二部「本島」ê章節中，阮kantaⁿ ē tàng做簡略ê描述；因為受限tī篇幅，致使作者soah無法度khǹg入koh khah全面ê有關台灣島、它ê資源kah島民方面ê資料。本冊內底khah個人á是感性ê元素，真chē lóng是編者主張beh khǹg入去ê；馬偕博士真勉強chiah同意編者為tio̍hbeh hō讀者ē tàng了解一位外國宣教師ê生活kah工作內部充滿chēchē親身ê物件，而且mā ē tàng了解tī本冊對話中所牽涉tio̍h ê hēchē事件kah個人經歷。本冊teh進行編輯ê時，台灣ê政治局勢當teh發生變化。Chiahê變化kiámchhái對宣教工作ē有一kóa具體ê影響。總是，阮無照台灣脫離清國ê事實來kā 本冊改寫。

幾個月來，我tiāⁿtiāⁿ kah馬偕博士tàu陣kah密切來往；我了解伊，阮親像siōng親密，siōng仝心ê朋友ánne來kah伊相bat。親像伊chit種充滿bē屈服ê活力、堅定不移ê勇氣kah剛強意志ê人，卻一點á都bē武斷，mā無因為別人ê批評來爭論，這對 hiahê kantaⁿ知影伊ê言論kah行動ê人來講，是一種啟示。看tio̍伊ê謙卑，koh知影伊ê信仰有gōa真實，以及伊私底下kah上主有gōa親近，to̍hē tàng明白伊成功ê秘訣。Tī教會ê任何一个時代，真少有人ē tàng對上主ê親近有比伊koh khah生動ê感受；伊所服事ê上主是一个ná布帆ê存在，ē tàng遮風cha̍h雨，是伊心靈中佔主導地位ê力量。Ánne ê先知是基督賞賜hō祂ê教會siōng好ê禮物；對伊來講，伊bē失敗，一切應該ê lóng成做有可能。

出版商全力以赴teh出版本冊；地圖是經過特別準備ê，hit三幅北台灣ê地圖，是tùi馬偕博士所繪製ê草圖複製完成ê；hit幅台灣地圖是tùi英國海軍部ê航海圖翻印ê；冊內底ê相片lóng是採用馬偕博士ê學生柯玖tī台灣所hip ê相片；封面設計代表tī本冊第二十二章有詳細描述ê稻á花、稻穗，kah稻á ê收割方式；本冊mā非常sèjī teh避免機械上ê錯誤，he是一本紹介外國生活ê冊所應該承擔的責任。

最後，我beh向加拿大長老教會海外宣道委員會秘書馬偕牧師（Rev. R. P. MacKay, B. A.）致謝。因為，tio̍算我ē tàng tī真無閒ê中間kā本冊編輯完成，m̄ koh，若無伊ê指教kah協助，編輯ê工作to̍hbē tàng hiahni̍h完善。

Tī chit本《From Far For-mosa》寄出ê同時，我祈求本冊ē tàng成做上主ê器具，來激起人想beh了解世界宣道事工ê興趣。

J. A. MacdonaldSt. Thomas, Ontario,1895年11月

賴永祥序

1872 年3 月9 日，喬治．叡理．馬偕登陸淡水。除了兩 pái休假 kah 擔任一屆加拿大長老會議長以外，伊一直留 tī 台灣擔任宣教師，直到 1901 年往生。

榮耀上帝來服務是非凡 ê 一生。起初，chitê「烏鬚ê 野蠻人」是 hō͘ 人好奇 kah 看輕 ê 對象。無人 beh 教伊本地話，m̄koh，伊耐心 teh 聽飼牛 gín’á ê 講話，學 kah ná 親像本地人 ê 一流講台灣話。伊 m̄bat 厭倦來研究Chiná 經典 kah 民間宗教，這hō͘ 伊 ē tàng 老步定 kah 文人階層 hâm 民間宗教信仰 ê 人進行辯論。伊 m̄bat 厭倦來探訪島上原住民 ê 庄 kha，chiahê 原住民因為後來ê 漢人soah 失去土地。

伊建立 60 間教會，而且教育有夠額 ê 台灣信徒來擔任傳教者。馬偕 tú 到台灣 ê 時，chitê島是清帝國ê 一部分，1895 年甲午戰爭後割讓 hō͘ 日本。Tī chitê過渡時期，馬偕 tī kah 新 ê 殖民主人來往 ê 時，伊成做台灣在地人 ê 保護者。

馬偕是 án 怎得 tio̍h chiahê成功 ê 技能？

1.Tāi 先是伊對台灣 kah 在地人有真誠懇 ê 疼。Chit 本冊 ê　起頭一段描述 kah 真好：「遙遠ê 福爾摩沙是我心所愛，tī hitê島上度過我 siōng 美好 ê 時光。Tī hia，我 ê 生活興趣 lóng 集中 tī 了 hia。我歡喜仰視高聳 ê山峰，àⁿ 落去看 hitê thí 開 ê 坑谷，遠遠眺望大湧 ê 大海。我愛 hiahê 皮膚烏 khia̍tkhia̍tê 人─Chiná 人、平埔番kah 野蠻人─ Chit 23 年，我一直 tī in 中間傳揚耶穌 ê 福音。為 tio̍h beh tī福音中拯救 in，我願意棄 sak 我ê 性命。」

伊對台灣人民 ê 認同是完全ê。Tī 伊 ê 個人生活中，伊娶台灣婦女做 bó͘，而且 kah 她生三个 gín’á。

2.伊 bat 寫 phoe hō͘ 加拿大宣教委員會，mài koh 派宣教師來。伊感覺 ē tàng 培養 jú 來 jú chē ê 台灣人成做傳教師 kah 長老，應該 kā in 支持。伊強調教育，tī 厝裡教神學，而且 tī 淡水創辦牛津學堂 kah 女學。

3.伊尊重當地 ê 傳統，伊了解儒家經典，bē 輸任何台灣ê 學者。伊堅定不移來傳福音 ê真理；伊講當地 ê 語言，為 tio̍h beh hō͘ 聽眾 thang 接受。

4.伊滿足所服務 ê 人 ê 需要ê 能力真驚人。In 需要有人來挽嘴齒，伊做到，而且教 in án 怎做。In 需要一个現代化 ê 病院，伊 tī 淡水建立一間醫館；in 需要一个反對腐敗政府官員 ê 倡導者，伊成做 hitê 人。

馬偕 tī 台灣 29 年 ê 歷史意義並 m̄kantaⁿ 限 tī 教會歷史。

十九世紀後期，台灣是遠東ê 落伍地區。馬偕 ê 教室裡總是有掛一張世界地圖，通過 chit 種方式 kah 其它真 chē 方式，伊有拓闊學生 kah 會眾 ê 眼界；伊是推動台灣現代化 ê 改革推動者。

喬治．叡理 tī 移民加拿大 ê蘇格蘭高地人 ê 家庭中大漢，是加爾文主義 ê 信徒；tútú to̍h 是仝款 ê 道德體係 kā 西方世界轉變成做民主社會。直到1996 年，李登輝當選人民直選 ê 總統，台灣民主化 chiah 開始。

Tī 充滿無確定性 ê 當今世界，咱擔心台灣 ê 未來。台灣一直是民主社會 ê 事實，ē tàng 成做支持台灣 siōng 有說服力 ê 理由。Tī chit 點來講，咱看 tio̍h上帝 ê 手 teh 做工；李登輝是一个基督徒，tùi 馬偕 ê kiáⁿ 創辦ê 淡水中學畢業。為 tio̍h 準備chiahê 一切，150 年前上帝派馬偕來到淡水。

好奇心真旺盛 ê 馬偕，伊觀察台灣 ê 歷史、地理、民族學、地質學、鄉土歷史、植物學、昆蟲學，而且 tī 伊 ê《馬偕在台灣記事》中記錄落來。Chit 本冊出版tī 1895 年，成做描述清朝統治末期台灣 ê siōng 重要書籍。

馬偕 ê 真 chē 朋友 lóng 勸伊寫自傳，m̄koh 伊無寫。總是，chit 本《馬偕在台灣記事》包含有關伊 ê 青年 kah 神學訓練，以及伊 tī 台灣傳福音工作中重大事件 ê 信息。所以，chit 本冊thang hō͘ 人認為是伊 ê 自傳 kah宣教 ê 教科書。

我致意用 chit 本重要著作ê 出版，來慶祝馬偕來到台灣北部 150 週年。由林俊育長老 tùi原文來完成台文翻譯，這是馬偕teh 講道 kah 日常生活使用 ê 台灣話。

咱來跟 tòe 馬偕 ê 腳步，tī台灣榮光咱主 ê 名。願祂賜福台灣 ê 人民，保守咱，賜咱平安。

───賴永祥

目錄

原文編輯序

賴序

第一部

引言第1章作者早年ê歲月

第2章Ti普林斯頓kah愛丁堡神學院

第3章Tùi多倫多到淡水

第4章初見台灣

第二部 島嶼

第5章地理kah歷史

第6章地質

第7章樹木、植物kah花卉

第8章動物

第9章人種概況

第三部 Chiná人ê處境

第10章有關台灣Chiná人

第11章政治kah司法

第12章實業kah社會生活

第13章Chiná人ê宗教生活

第14章宣教事工ê開始

第15章頭一个本地牧師kah伊ê教會

第16章 起造教會

第17章 阮án怎征服艋舺

第18章 北部ê巡迴宣教

第19章 Teh等待ê島嶼

第20章法國兵攻打台灣

第四部 被征服的原住民

第21章平埔人ê特徵

第22章台灣ê稻作

第23章Tī平埔族中間ê宣教事工

第24章沿東海岸落南ê巡迴宣教

第25章對平埔族ê宣教

第26章南勢族人ê生活 第五部 Koân山頂ê高山族

第27章高山族ê生活kah風俗 第28章Kah獵人頭族ê交陪

第六部 宣教總部

第29章淡水素描

第30章培訓本地傳教者

第31章牛津學堂

第32章對本地婦女宣教ê本地傳道者

第33章醫療工作kah病院

第34章外國人kah宣教事工

第35章Kah英國長老會ê關係

第36章回顧kah前瞻

附錄 偕叡廉追思老父